اساݙے صوبہ دءِ مطالبے تے کاویڑ کرݨ والے اپنڑاں حق سنبھالن تحریر: فیصل شہزاد چغتائی

اساݙے صوبہ دءِ مطالبے تے کاویڑ کرݨ والے اپنڑاں حق سنبھالن

تحریر: فیصل شہزاد چغتائی

بانگ ملدء ھی شروع تھیوݨ والی سوشل میڈیا تے آوازاں کہ تقسیم نا منظور پنجاب کو تقسیم نا تھیوݨ ݙیسوں مر ویسو، سرائیکیاں نال ایم کیو ایم والا حال کریسو، پاکستان اساݙا ھِ ، میڈی سمجھ توں انہاں دے گالھیں نکل ویندن، کافی کوشش کرینداں کہ انہاں کو احسن انداز ءچ سمجھایا ونجے لیکن اءِ صوبے دا ناں گھیندے ھِ ہر گالھ ءچ کاویڑ کریندن، پنجابی اصیل جانڑدن کہ انہاں دی اصلیت کیا ھِ تے سرائیکی قوم نے انہاں کوں سہارا ݙیتا انہاں دی مدد کیتی، ہجرت کر تے آوݨ والے او پنجابی خاندان جنہاں دے بزرگ اج وی زندہ ھن اور سرائیکیاں کوں محسنِ پنجابی سمجھدن لیکن نینگر پتہ نی کیندے آکھے لگے ودن۔ ہر ویلے کوئی ایہو جئی موری دی تلاش ءچ رھاندن کہ جیتھون ݙنگ مارا ونجے۔ جئیں ویلے حق دی گالھ ٹُرے تے ول آکھیدن کہ اساں کوں اے گالھ فلانڑیں فلانڑیں کیتی ھِ آلے پاسے آوݨ تے الاوݨ توں پردہ کر ویندن۔
سرائیکی جئیں ویلے اپنڑی شناخت دی گالھ کریندن، تے انہاں پنجابیاں دے وَس ءچ نہ ہوندا کہ انہاں کوں کھلیاں نال پھے ونجن۔ ݙوجہے پاسے سرائیکیاں دیاں محبتاں ݙیکھو ، کہ انہاں نال پنجابی وی ایں سانگے آلیندن کہ انہاں کون اے نال لگے کہ او پرائے ھن اے سلسلہ ہجرت کر تے آون والے پنجابی جئیں ویلے وسیب دے ءچ آئے تے ایتھاں اون ویلے دے بزرگاں نے انہاں کوں اپنڑیں بالاں وانگوں سینے نال لایا، پہلے دے ویلے بہوں چنگے ھن وڈیرے محبت دا درس ݙیندے ھن تے ہر مہمان تے ٹھر ویندے ھن لیکن جو اج تک سرائیکیاں دے خون دی صورت ءچ او درس موجود ھِ اج وی اے قوم محبت ݙیندی ھ، مہمان نواز ھِ تے ٹھر ٹھر ویندی ھِ لیکن بدلے ءچ ایکوں جئیں ویلے تسلیم ہی کرݨ تو انکاری تھیا ونجے تے ݙوکھ لگدے ، تے انکاری وی او تھیون جنہاں دءِ بزرگاں کوں اساݙے بزرگاں جاواں ݙیتیاں ڈنگر ݙیتے کاشتکاری ءچ مدد ݙیتی اج او اے آکھن کہ سرائیکی قوم تے زبان دا کوئی نشان ھی کینی تے اے اپنڑیں بزرگاں دے ٻکل تے لعنت پھیرݨ وانگ ھِ ، ٹھیک آکھا ویندے جیتھاں ماں پیو حلالی ہوون تے لازمی نی ہوندا کہ اولا د وی حلالی ہووے، جو درس اساݙے بزرگاں نے محبتاں دا ݙیتا اساں اج تک اوں درس دے مطابق ٹُردے آندے ہیں تے جئیں ویلے تک ممکن ہوسی سبھ نال محبت ، بھرپی تے اخلاق نال پیش آندے رھاسوں۔

٧١ سال کیویں گزر گئے کجھ پتہ نہ لگا لیکن صابر قوم سرائیکی دے عرج کوں زوال ءچ بدلݨ ءچ بہوں سیاستاں کیتیاں گئیاں تے اج تک ایں سرائیکی خطے تے قبضے تےپنجابی آبادکاریاں دا سلسلہ شروع ھِ ، اج جاوید چوھدری جے منافق صحافی لکھیندن کہ پنجاب ءچ 48 فیصد پنجابی الائی ویندی ھِ تے 10 فیصد سرائیکی ، تے اے گالھ ہضم نی تھیندن، سرائیکی آبادی کم و بیش 6 کروڑ توں ودھ ھِ اے 2015ء دے اعداد و شمار ھن تے آوݨ والیاں نوی نسلاں جو پنجھ سال ءچ آبادی ودھی، انہاں تے 6 کروڑ سرائیکیاں کوں بدلݨ دی جدوجہد ٧١ سالاں تون چلدی آندی ھِ ۔ اساݙے بزرگ احساس کریندے رہے تے اے پاڑ پٹیندے رہے۔ کل حقے پنجابی بھکیندے ھن اج سرائیکیاں دی چمچا گیری کر کر تے خود چوھدری بݨ گئن تے اج سرائیکی حقے بکھیندن ، اے پنجابیاں دے گالہیں ھن، اج پنجابی وݙے لوگ ھن تے انہاں بہوں محنت کیتی ھِ منزل حاصل کرݨ کیتے ، جیاء محنت تاں تھیندی ھِ چاپلوسیاں کر کر تے ، کھل بٹاں لا لا تے ، اساݙے بزرگاں کوں ٹھگݨ آسان کم نا ھا ۔
٢٥ سال پہل اگر میڈی نظر ماضی تے پوندی ھِ تاں ایندے ءچ گڈی ءچ بیٹھے کجھ بال آپس ءچ آکھیندے ملدن کہ اساں پنجاب ویندے پئے ھیں ۔ میں حیریت نال انہاں توں پچھدا کہ پنجاب کیتھاں ھِ تاں او آکھیدن کہ صادق آباد توں پنجاب شروع تھئی ویندے۔ مطلب اء کہ انہاں بالاں دی عمر لگ بھگ اوں ویلے ٧ سال ہوسی ، اتنی تربیت کیتی گئی ھِ تے پلاننگ نال سرائیکی خطے کوں پہل پنجاب ءچ منتقل کیتا گئے ایندے بعد سرائیکی ثقافت و تہذیب کوں اپنڑیں ثقافت ، تے اج سرائیکی زبان کوں پنجابی زبان دھڑلے نال آکھا ویندا پئے ۔ جو کہ نویں موسمی تاریخ داناں دی سازش دا ویگڑا ٻکل ھِ اتنی وݙی سازش کلھے تھیوݨ نا ممکن ھائی ایندء ءچ جو جو شامل رہے ماضی ءچ تے جنہاں جنہاں سرائیکی خطے کوں پنجاب ءچ بدلے تے سرائیکی زبان کوں ہر مردم شماری ءچ پنجابی زبردستی لکھ تے سرائیکیوں کوں ١٠ فیصد تے ٤٨ فیصد پنجابیاں کوں ظاہر کیتے وݙی چلاکی دا سامان کیتے۔ تاریخ دے ورقیاں ءچ اج وی سرائیکی قوم دا عرج عیاں ھِ تے انہاں ڊ ا رھن سہن، تہذیب ثقافت اہمیت رکھیندے، اردو در حقیقت قدیم زبان سرائیکی ءچوں وجود ءچ آئی ھِ تے ایندی تکمیل ءچ بہوں وݙا حصہ سرائیکی زبان دے لفظاں دا ذخیرہ ھِ انہاں لفظاں دے تعاون دے بغیر ایں زبان دا پورا تھیوݨ ممکن ای نا ھا ۔
تکلیف جئیں کوں ہوندی ھِ ڈاکٹر کول وی او ویندے بلاوجہ کوئی ہسپتال دا منہ نی کریندا ، تے تکلیف دا اندازا کہیں ݙوجہے کوں نی تھیندا صرف اُو درد محسوس کریندے جو تکلیف ءچ ہوندے، سرائیکی خطے کوں پنجاب ءچ بدلݨ ، ایندے بعد سرائیکی زبان کوں پنجابی زبان آکھݨ تے اج اے آکھ ݙیوݨ کہ سرائیکی ناں دی نا ہی کوئی قوم ھِ تے نا ہی کوئی زبان ۔ اے دعوے دے نال سرائیکیاں دی شناخت مٹاوݨ دی مذموم کوششاں کرݨ دے بعد وی اگر آکھا ونجے کہ لوگ اپنڑی سنجھاݨ بچاوݨ کیتے جدوجہد نہ کرن تاں عجب گالھ ھِ ، تکلیف ءچ آہ تاں نکلدی ھِ ، کوئی وی قوم ہووے اوندا حسن اوندے فرد دے اخلاق نال پتہ چلدے، محسن قوماں ہو ہوندن جو کہیں قوم دا حق نی کھاندیاں ، تے اپنڑی سنجھاݨ نال زندہ رھاندن جیویں کہ سرائیکی قوم، میکوں یاد کینی کہ کہیں ھک سرائیکی نے اج تک اے آکھا یا لکھاہووے کہ پنجابی اساݙی زبان یا قوم دا حصہ ھن ، انہاں پنجابیاں کوں پنجابی سمجھے ۔ لیکن افسوس ! پنجابی سرائیکی خطے کوں وی پیو دی جاگیر سمجھدن تے قوم دی زبان سرائیکی کوں وی اپنڑی زبان دا لہجے آکھیندن، ہجرت کر تے آوݨ والے پنجابی اُون ویلے اَن دے متلاشی ھن ، اُون ویلے محسن ریاستاں نے ہی انہاں کوں جاء ݙیتی۔ اَن ݙیتا ، انہاں کوں زندگی دی ضرورتاں دا سامان ݙیتا۔ اج او تاریخ مٹا تے آکھیدن کہ اساں پچھوں چوہدری آیسے ، اساݙا پیو ڈاڈا چوھدری ھا، اساݙی اپنڑی چودھراہٹ ھائی تے پنجاب اساݙا ھِ ایندی تقسیم نا منظور ھِ افسوس ! صد ھا افسوس۔ اساں کوں سوہنڑاں نی لگدی کہ اساں اپنڑیں بزرگاں دے کیتے گئے احسان ول ول ڈساوں لیکن احسان فراموشی دی سبھ حداں توڑ ݙیتیاں گئیاں ھن۔
سرائیکیاں دی محبتاں دا ثبوت اج سرائیکی خطے ءچ بلاتفریق رنگ و نسل قوماں دی افزائش ھِ جو پاکستان دءِ وجود ءچ آوݨ توں بعد ایتھاں آئے تے اپنڑیں بالاں دے بہتر مستقبل لبھے، واحد سرائیکی ایہو جئی قوماں ءچ شمار تھیندی ھِ جیندا وجود پاکستان توں پہل ھا ، ایں سرائیکی خطے ءچ اگر کوئی قدیمی زبان ، تہذیب ، قوم وجود رکھیندی ھِ تاں او سرائیکی ھِ ، اتنے وݙی زبان قوم کوں کوزے ءچ بند نی کیتا ونج سکدا، سرائیکیاں دے بالاں کوں نشیاں ءچ لا تے ، انہاں کوں لوفر بازی ءچ لا تے انہاں دے مستقبل گالھ تے اپنڑیں بالاں دا مستقبل روشن کرݨ والی قوم اج اپنڑیں بالاں دے ذریعے سرائیکی قوم تے قابض ھِ ۔ انصاف دے در تے منصف پنجابی، تعلیم ونڈاوݨ والے در تے معلم پنجابی، تھانڑیاں ءچ اعلی کُرسیاں تے پنجابی، گورنمنٹ ءچ اعلی عہدیاں تے قابض پنجابی ، ایندے بعد کیھڑی ونڈ تے انصاف دی گالھ کریندو؟ ریاست سمیت سرائیکی خطے دا الحاق پنجاب ءچ اپنڑیں مرضی نال کرݨ دے بعد اتنے سالاں ءچ کیھڑا حق ݙے ݙیتے ؟ نہ ہسپتال ، نہ ڈسپنسریاں ، نہ کالج ، نہ اعلی سکول تعلیم ، جو دعوی پنجابیاں دی طرفوں کیتا ویندے کہ اساں پنجاب کوں حق ݙیتے ، تے ذرا ڈساون اگر حق ݙیتے تے اج سرائیکی خطے دیاں دیہاں روز تپدی دھوپ ءچ ٥ توں ٨ کلو میٹر روزانہ ٹُر تے تعلیم دے حصول واسطے ویندن، کیوں اج تک سکول نی بݨ سکے؟ ہک قوم کو جہالت دی بھٹی ءچ دھکا ݙیوݨ والے پنجابی اپنڑیں بالاں کو اعلی تعلیم پاروں امریکا ، یورپ جئے شہاراں ءچ بھجیندن، تے اعلی توں اعلی تعلیم ݙیندن ۔ ݙوجہے پاسے سرائیکیاں دی حق تلفیاں دا سلسلہ طویل ھِ کہ اگر لکھݨ لگوں تاں شاید ہزاراں صفحات تے تحریر ونجے لیکن انہاں کوں شرم نی آندی، کہیں دا حق کھا تے خود کو چوہدری آکھݨ والے شرم کرن ، چوہدری دا مطلب سمجھن تے غور کرن ایں لفظ دا مطلب دے معنی کیا ھن ول ݙیکھن کہ کیا او چوہدری سڈھواوݨ دا حق رکھیندن؟ پر پاسوں ݙنگ مار تے ایند بعد آکھݨ کہ کجھ نی تھیا تساں بھیرا ھیووے اساں سبھ مسلمان بھیرا ھیں ، اساں پاکستان ہیں ۔۔۔۔ عجب مذاق ھِ ، سرائیکی ، پنجابی ، سندھی ، پختون ، بلوچ ، انہاں قوماں ءچ تمام مذاہب موجود ھن ، مذہب دی گالھ ہی نی تھیندی پئی ۔ گالھ تھیندی پئی ھِ شناخت دی ۔ تے ایکوں مذہب نال جُڑݨ لطیفے وانگوں ھِ ۔ اساں کجھ آکھیندے ہیں تے او اساݙی حق دی جدوجہد کرݨ کوں کافر تھیوݨ نال ملا ݙیندن۔
اگر سرائیکی خطے دے لوگ پنجابیاں دے بھیرا ھن تاں وی ݙاڈھی شرم دا مقام ھِ کہ بھیراواں دا حق سالہاسال توں کھا تے اکڑ تے آکھیندن کہ اساں حق ݙیندے پئے ہیں سبھ سرائیکیاں کوں ، معذرت نال میں ایں گالھ تے متفق کینی کہ پنجابیاں سرائیکیاں کوں بھیرا سمجھے۔ اگر سمجھن ھاں تاں اج ایں آواز دا وجود وی نہ ہووے ھا۔ اساں پاکستانی ہیں ، جی سرائیکی قوم خطے دا تعلق پاکستان دے نال ھِ تے تمام سرائیکیاں دے شناخت کہیں ݙجہے ملک دے کینی پاکستان دے شناختی کارڈ ھن تاں اساں وی پاکستانی ہیں ۔
پنجاب کوں بادشاہت ظاہر کرݨ والے اے تاں ݙساون کہ ایں بادشاہت دا بادشاہ کون ھِ ، صوبہ پنجاب کیندی جاگیریا سلطنت ھِ کیھڑا بادشاہ انہاں کوں لکھ دے ݙے گئیے کہ پنجاب پنجابیاں دا ھِ ، دلیل دے نال گالھ سوہنڑی لگدی ھِ ۔ جیتھاں تک میڈے علم ءچ ھِ پاکستان ءچ جو صوبے وجود ءچ آئے تمام لسانی بنڑے۔ سندھ ، سندھی تے ݙوجہی وݙی زبان سرائیکی رکھیندے ، بلوچستان ، بلوچکی تے ݙوجہی زبان سرائیکی ھِ ، سرائیکی خطے ءچ ٩٧ فیصد سرائیکی الاوݨ والیاں مقامی ھن ، باہرلے آج آ تے اے دعوی نی کر سکدے کہ اے مقامی ھن کیونکہ انہاں کوں ثابت کرݨ کیتے کوئی مصدقہ تاریخ ݙیونڑی ہوسی جو کہ انہاں کول کینی۔ جو تاریخ دی گنڈھ اے اج تک لائندے پئن او انڈیا دے نال جڑدی ھِ ، یا بوگس مردم شماریاں دے دی بنیاد تے،پاکستان ءچ جتنیاں مردم شماریاں تھئیاں انہاں تمام کوں سرائیکی خطے دے لوگاں نے مسترد کیتا، اپنڑاں جمع تفریق کر تے اُتے رپورٹ ویندی رہی کہ سبھ پنجابی ہیں ۔۔۔ اساں کوں پنجابی دعوے دار یا موسمی تاریخ دان اے ثابت کر ݙیوون کہ پنجاب سلطنت ھِ تے سرائیکی خطے ایندی جاگیر ھِ تاں اساں مطالبہ کرݨ چھوڑ ݙیسوں ۔
پہل تاں سبھ اے ذھن نشین کر گھینو ، کہ پاکستان دے تمام صوبے لسانی ھن ، سندھ ، بلوچستان ، پنجاب، خیبرپختونخوا، سرائیکی خطے کوں زبردستی پنجاب دے نال ملایا گئیا جیندے ءچ زمینی حقائق اء ھن کہ سوائے چند منافقاں دے کوئی وسیب زادہ ایں حق ءچ نا ھا۔ لیکن زبانی جمع تفریق کر تے پورے خطے کوں پنجاب ءچ ، تے کراچی کوں سندھ ءچ ملا ݙیتا گئیا۔ خیر! موجودہ حالات ءچ اج سرائیکی خطے دے لوگ اپنڑیں خطے ءچ کجھ کرݨ چاھندن ترقی چاھندن تے اے در حقیقت پاکستان دی ترقی ھِ ناکہ کہیں سلطنت دی تقسیم ، پنجاب وی ھک صوبہ ھِ ، اے ملک کینی تے نا ہی مقبوضہ کشمیر وانگوں ریاست کہ تقسیم تے لہو لہو تھئی ونجے۔ پاکستان دی گورنمنٹ اختیار رکھیندن ھِ انہاں تمام صوبیاں تے ، نواں صوبہ وجود ءچ آندے تاں او صوبہ افغانستان ، ایران یا بھارت دا نہ ہوسی ، تے نہ ہی نویکلی سلطنت یا بادشاہت اے وے تمام صوبیاں وانگ ہوسی ، ایندء ءچ وہ پاکستان دا ہر فرد جو شناختی کارڈ رکھیندے اپنڑیں نسل پال سکدے۔اتنی نکی جئی گالھ کوں ودھا چڑھا تے پوری دنیا ءچ پیش کیتا ویندا پئے تے انا دا مسئلہ بنڑاں گھیدے ۔ جغرافیائی اعتبار نال تے لسانی اعتبار نال سرائیکی خطے ھک نویکلے صوبے دا حق رکھیندن، ٧١ سال ءچ ایں صوبے نے صرف قربانیاں ہی ݙیندا آئے۔
ووٹ گھنݨ سانگے ایں سرائیکی خطے دا وجود بہوں وݙی اہمیت رکھیندے ، لیکن حق ݙیوݨ سانگے چھیکڑ ءچ ناں آندے تے ݙیوݨ دے ویلے نویں الیکشن آ ویندن تے ول وعدے تھیندن تے ول حق ݙیوݨ دیان قرارداداں پاس تھیندن تے جئیں ویلے حق ݙیوݨ دی واری آندی ھِ مدت پنجھ سال ختم تھئی ویندی ھِ یا تاں جمہوری مدت ١٠ سال کر ݙیتی ونجے تاکہ ایں سرائیکی خطے دا نمبر آ سکے۔ یا سرائیکی خطے کوں بشمول ریاست بہاول پور بحالی تحریک ملا تے ہک صوبہ وجود ءچ گھن آیا ونجے ۔
ڈوجہے پاسے صوبہ اپوزیشن ݙیوݨ چاھندی ھِ لیکن ناں جنوبی پنجاب، مطلب اءِ کہ پنجاب دا ݙومیسل پورے پنجاب ءچ کارآمد ہوسی نویں ڈومیسل نہ بنڑائے ویسن تے جتنے سرکاری اداریاں تے پنجابی برجمان ھن ، معذرت نال خود ونج تے ݙیکھ سکدے وے ہر وݙی کرسی پنجابیاں تک محدود ھِ سرائیکیاں کوں تاں صرف بھرت کرݨ سانگے رکھا گئیا ھِ ، پاکستان دی کوئی وی انڈسٹری ہووے ، کنسٹریکشن ہووے ، ٹیکسٹائل ہووے، فارما انڈسٹری ہووے غرض اء کہ ہر جاء تے سرائیکیاں کوں ایندھن دے طور تے استعمال کیتا ویندے۔ جئیں ویلے ڈومیسل پنجاب دا جنوبی پنجاب تے مسلط رھاسی تاں سرائیکی بال ول ھکلے ویسن، سوٹیاں نال ، ڈنگراں وانگ ول تھانڑیندار دے ذریعے ھکلا ویسی ، زمیناں تے قبضے تھیسن ، حقدار اپنڑیں درخواستاں عدالتاں ءچ لا تے پیشیاں بھگت بھگت تے مر ویسی ۔ لوگ مردے رھاسن تے بااثر ول ایں خطے تے قابض رھاسن۔ انصا ف دے در ماضی وانگ مستقبل ءچ وی بند رھاسن۔
سرائیکی خطے دے لوگ ہک نویکلا لسانی صوبہ چاھندن جیویں سندھ ، بلوچستان ، پنجاب تے خیبر پختونخواہ جیتھاں مقامی زبان ءچ تعلیم ݙیتی ونجے۔ انہاں دے بال پڑھ لکھ تے اعلی گورنمنٹ پوسٹاں دے اھل ہوون تے پہل حق رکھیندن ہوون انہاں دا اپنڑاں ݙومیسل ہووے تاکہ انہاں دی سنجھاݨ نویکلی ہووے۔ سرائیکی خطے کوں اگر صوبہ سرائیکستان ناں ݙیتا ویندے تاں اے ایندا حق بنڑدے ، تیں ایں پاروں ریاست بہاول پور وی محبت رکھے تے ھک صوبے دی شکل ءچ مل تے ایں خطے دی ترقی ءچ کم کیتا ونج سکدے ایتھاں بال سرائیکی خطے دے سانگے کجھ کرݨ چاھندن ۔ لیکن او اج تک اپنڑی سنجھاݨ تے تھیوݨ والی ڈکیتی تے نوحہ کنی کریندن ۔ کوئی قوم اختیار نی رکھیندی کہ او کہیں ݙوجہی قوم دی ثقافت ، تہذیب ، تے زبان تے قابض تھیووے تے قوم دی سنجھاݨ ختم کرے۔ ہر قوم ملک پاکستان ءچ اختیار رکھیندن ھِ تے ایکوں تسلیم کرݨ ءچ کہیں کوں وی اعتراض نی تھیونڑاں چاھیدا۔ نا بھلا ونجے کہ سرائیکی خطے دے عوام پاکستان دے ہر شہار ءچ اکثریت رکھیندن تے ہر قوم کوں تسلیم کریندن تے انہاں دی زبان الیندن ، کوئی دل ءچ میل نی رکھیندا لیکن اگر اے مترائی ماں والا سلوک رکھا گئیا ، تے ایندے نتائج مزید سنگین تھئی ویسن۔

صوبہ سرائیکستان دی آواز لگݨ تے پنجابیاں دی کاویڑ کرݨ نہایت ہی افسوس ناک ھِ اساں انہاں دی شناخت تے ڈکیتی نے مریندے پئے تے نا ہی پنجابیاں کوں کڈھیں سرائیکی آکھے یا لکھے ، لیکن او زبردستی سرائیکیاں کوں پنجابی بنڑاوݨ تے لگے ھن جو کہ بہتر کینی ۔ ذیادتی وانگ ھِ کہیں دی شناخت کیوں کوئی اپنڑیں اُتے مسلط کرے۔ ؟ ھک طریقہ بچدے اگر او بہتر لگے جئیں نال سرائیکی قوم پنجابی بݨ سکدی ھِ ، کہ اپنڑیاں دیھاں دیاں شادیاں سرائیکیاں ءچ کر ݙیو ، جئیں ویلے سرائیکی گھر ءچ پنجابی ماں ہوسی تے اوندے جھولے ءچ پلݨ والے بال جو لوری دی آواز سنڑسن او پنجابی ءچ ہوسی تاں زبان بدلدی ویسی، ایندے علاوے کوئی حل کینی ۔ شناخت بدلݨ پیو بدلݨ وانگ ھِ تے سرائیکی کڈھیں جنوبی پنجاب اپنڑیں سرائیکی خطے تے تسلیم نہ کریسن۔

وزیر اعظم عمران خان ،وزیر اعلی عثمان بزدار، شاہ محمود قریشی ، خسرو بختیار کوں مثبت انداز ءچ معاملے دی سنگین کوں سمجھن تے ایڈے اُڈے دیاں گالھیاں کوں چھوڑ تے ، سرائیکی خطے کوں صوبہ سرائیکستان ، وسیب یا ول سرائیکی صوبے دا ناں ݙیون تاکہ سبھ صوبیاں دے نال نال ایں صوبہ وی لسانی طور تے وجود ءچ آوے تے ترقی دی راہ ہموار تھیووے ۔ پنجاب تے قبضہ کرݨ دا کوئی اختیار نی رکھیندا تے نہ ہی کوئی ایکوں سلطنت یا اپنڑیں جاگیر آکھ سکدے۔ اے صرف پاکستان دا صوبہ ھِ تے صوبائی حیثیت رکھیندے نا کہ اے بنگلہ دیش ، یا مقبوضہ کشمیر ھِ یا اے بھارت دا حصہ ھِ ، ایں سانگے جو فیصلہ کیتا ونجے ایندے ءچ زمینی حقائق کو مد نظر رکھا ونجے اے نا ہووے کہ جنوبی پنجابی ، کہیں دی خوش اسلوبی کیتے مزید گلے پئے ونجے۔ وبال جان بݨ ونجے ۔ تے ایہو جئے عناصر جو ݙینھ رات سرائیکیاں کوں پوری دنیا ءچ پنجابی آکھیندے ودن انہاں کوں وی اپنڑی اپنڑیں قلماں کوں حق تے سچ لکھݨ دا عادی بنڑاونڑاں چاھیدا ھِ نہ کہ کوڑ لکھ لکھ تے نوجوان نسلاں تک نفرتاں پھجا ونجن۔ نہ بھلا ونجے اگر پنجابیاں دی محسن اگر کوئی قوم ھائی تاں او سرائیکی قوم ھائی اگر یقین کینی تاں اپنڑیں بزرگاں توں پچھن سرائیکیاں نا کل ذیادتی کیتی نہ ہی مستقبل ءچ کریسن۔ نہ ہی خطے ءچ آباد سندھی ، اردو ، پنجابی ، بلوچی زبان والے تے اپنڑیں شناخت مسلط کریسن۔

 

Faisal Shahzad Chughtai  is a moderator/editor of Saraiki news and IT expert from Saraiki wasaib and our CAUSE FELLOW

Email: [email protected]

پوسٹ ٹیگز:

Your email address will not be published. Required fields are marked *

*
*